vanni 
(ஜே.எம்.ஹபீஸ் )
அமைச்சர் ஹக்கீம் மற்றும் சுகாதாரத் துறை பிரதியமைச்சர் பைஸல் காசிமுக்கு மத்திய மாகாண சபையில் கடும் எதிர்ப்பு தெரிவிக்கப்பட்டது.
இதேவேளை, ஆளும் ஐக்கிய மக்கள் சுதந்திர கூட்டமைப்பு உறுப்பினரொருவர் செங்கோலை எடுத்துச் சென்றமையால் பெரும் பரபரப்பு ஏற்பட்டது. இதனால், மத்திய மாகாண சபையின் நேற்றைய அமர்வுகள் வெறும் 20 நிமிடங்களுடன் நிறைவடைந்தது.
அத்துடன் மத்திய மாகாண சபை நடவடிக்கைகள் எதிர்வரும் ஜூலை மாதம் 5 ஆம் திகதி வரை ஒத்திவைக்கப்பட்டது.
சுகாதார அமைச்சினால் மத்திய மாகாணத்தில் மேற்கொள்ளப்பட உள்ள அபிவிருத்திப் பணிகள் தொடர்பான கலந்துரையாடலை நடத்தியவர்கள் மாகாண சுகாதார அமைச்சருக்கு அறிவிக்க வில்லை என்ற விடயமே சூடு பிடித்து செங்கோல் தூக்கிச் செல்லப்பட்டது.
இது பற்றி மேலும் தெரிய வருவதாவது-
சுகாதாரத்துறை பிரதி அமைச்சர் பைசல் காசிம் மற்றும் நகர நிர்மாண நீர்வழங்கல் அமைச்சர் றவூப் ஹகீம் ஆகியோர் நேற்று முன்தினம் திங்கட்கிழமை கண்டி, மத்திய மாகாண சுகாதார அமைச்சில் ஒரு கலந்துரையாடலை நடத்தினார்கள்.
அதில், மாகாண சுகாதார சேவைகள் பணிப்பாளர் டாக்டர் திருமதி. சாந்தி சமரசிங்க மற்றும் வைத்தியசாலைகளின் மாவட்ட வைத்திய அதிகாரிகள், ஏனைய உயர் அதிகாரிகள், அமைச்சர் ரவூப் ஹக்கீமின் பிரத்தியேக செயலாளர் எம்.நயிமுல்லாஹ் உள்ளிட்டோர் கலந்துகொண்டனர்.
இதன்போது, கட்டுகஸ்தோட்டை, தெல்தோட்டை, கலகெதர, அக்குறணை ஆகிய மாவட்ட வைத்திய சாலைகள் உட்பட தம்புள்ளை மற்றும் ரிக்கிலகஸ்கட ஆதாரவைத்திய சாலை என்பவற்றின் புதிய கட்டிட வசதிகள், புனர் நிர்மாணம், உட்கட்டமைப்பு வசதிகள், மருத்துவ உபகரணங்களின் தேவை, தாதிமார் நியமனம் என்பன தொடர்பில் விரிவாக கலந்துரையாடப்பட்டன.
இவற்றிற்காக 1500 மில்லியன் ரூபாய்களை ஒதுக்குவதாகவும் தெரிவிக்கப்பட்டது.
ஆனால் மாகாண சுகாதார அமைச்சரின் அனுமதியின்றியே மேற்படி கூட்டம் நடத்தப்பட்டதாகவும் தான் அமைச்சுக்குச் சென்றபோது சுமார் 20 வாகனங்கள் அளவில் நிறுத்திவைக்கப்பட்டிருந்ததாகவும் அதன் போதே தனக்கு இவ்விடயம் தெரிய வந்தது என்றும் நேற்றைய தினம் இடம்பெற்ற மத்திய மாகாண சபை அமர்வின்போது சபையில் மத்திய மாகாண சுகாதார அமைச்சர் பந்துல யாலேகம சுட்டிக்காட்டினார்.
இது சபையையையும் மாகாண அமைச்சையும் அவமதிக்கும் செயல் என அவர் தனது கண்டனத்தையும் வெ ளியிட்டார்.
அவ்வமயம் சபைக்கு சபைத் தலைவர் எல்.டி.நிமலசிறி தலைமைதாங்கிக் கொண்டிருந்தார். குறுக்கிட்ட முன்னாள் மாகாண விவசாய அமைச்சரும் சுதந்திர ஐக்கிய முன்னணி(விமல் வீரவன்ச அணி) அங்கத்தவருமான நிமல் பியதிஸ்ஸ மேற்படி விடயம் பாரதூரமான உரிமை மீறலாகும் என்று உரத்த குரலில் பேசிக்கொண்டிருந்தார்.
அப்போது சபைத்தலைவர் இது தொடர்பாக தான் அறிக்கை ஒன்றைத் தரும் வரை பொறுமையாக இருக்கும் படி கேட்டுக்கொண்டார்.
இருப்பினும் நிமல் பியதிஸ்ஸ உரத்த குரலில் தாம் சபையை பகிஷ்கரித்து வெளியேறுவதாகக் கூறிவெளியேறினார். அவரைத் தொடர்ந்து இன்னும் ஐந்து பேர் அளவில் வெளியேறினர்.
அப்போது சபையில் வீற்றிருந்த ஐ.ம.சு.கூட்டணி அங்கத்தவர் திலக் ராஜபக்ஷ செங்கோலைத் தூக்கிக் கொண்டு அவரும் வெளியேறினார். சபை ஊழியர்களும் சபைச் செயலாளரும் பின் தொடர்ந்து சென்று செங்கோலைக் கைப்பற்றினர்.
பின்னர் அங்கு உரையாற்றிய விளையாட்டுத்துறை இளைஞர் விவகார அமைச்சர் பிரமித்த பண்டார தென்னகோன் மாத்தளை மாவட்டத்தில் இதுபோன்று விளையாட்டுத்துறையுடன் தொடர்புடைய ஒரு சம்பவமும் நடந்தது. நான் விளையாட்டுத்துறை மாகாண அமைச்சரான போதும் எனக்குத் தெரியாமல் இப்படியான விடயங்கள் மாத்தளையிலும் முன்னர் நடந்துள்ளன. எனவே இது தொடர்பாக மத்திய அரசுக்கு அறிவிக்க வேண்டும் எனக் கூறிய போது சபையில் சலசப்பு ஏற்பட்டது.
உடனே மு.ப. 10.20 இருந்து 10.40 வரை சபை நடவடிக்கைகளை தற்காலிகமாக ஒத்திவைப்பதாக முதல்வர் அறிவித்ததும் 20 நிமிடங்கள் கூடிய சபை கலைந்து சென்றது.
பின்னர் மு.ப.11 மணிக்கு சபை மீண்டும் கூடிய போது மாகாண போக்குவரத்து அமைச்சர் எதிரிவீர வீரவர்தன இப்பிரச்சினை தொடர்பாக சபை நடவடிக்கைகளை ஒத்திவைக்க வேண்டும் எனப் பிரேரித்தார்.
அதனை ஏற்றுக் கொண்ட சபை முதல்வர் அடுத்த அமர்வை ஜூலை மாதம் 5 ஆம் திகதிக்கு ஒத்திவைத்தார்.
இது இவ்வாறிருக்க மத்திய மாகாண சபை சுகாதார அமைச்சர் பந்துல யாலேகம இது குறித்து மத்திய மாகாண ஆளுநர் திருமதி துலூகா ஏக்கநாயக்கவிடம் முறையிட்டுள்ளார்.
இதனையடுத்து இவ்விவகாரம் குறித்த முழுமையான அறிக்கையொன்றை சமர்ப்பிக்குமாறு கண்டி மாவட்ட சுகாதார பணிப்பாளருக்கு பணிப்புரை விடுத்துள்ளமை குறிப்பிடத்தக்கது.