பிபிலை வலயக் கல்விப் பணிப்பாளராக சரீனா பேகத்தை மீண்டும் நியமிப்பதற்கு ஊவா மாகாண கல்வித் திணைக்களம் இணக்கம் தெரிவித்துள்ளது.
கடந்த 10ஆம் திகதி முன்தினம் உயர் நீதிமன்றத்தில் இடம்பெற்ற வழக்கு விசாரணையின்போதே ஊவா மாகாண கல்வித் திணைக்களம் இந்த இணக்கத்தை வெளியிட்டதாக சட்டத்தரணி ருஷ்தி ஹபீப் தெரிவித்தார்.
பிபிலை கல்விப் பணிப்பாளராக 2015ஆம் ஆண்டு நியமிக்கப்பட்ட சரீனா பேகத்தின் நியமனத்தை இரத்துச் செய்து பிறிதொருவரை ஊவா கல்வித் திணைக்களம் நியமித்திருந்தது.
தகுதி அடிப்படையில் தனக்கு வழங்கிய நியமனத்தை தான் ஒரு முஸ்லிம் என்பதால் இரத்துச் செய்ததாக சரீனா பேகம் உயர் நீதிமன்றத்தில் வழக்குத் தாக்கல் செதிருந்தார்.
உயர் நீதிமன்ற நீதியரசரான பரியாசாந்த டெப் நஸில் பெரேரா மற்றும் ஜே. ஆப்ரூ ஆகியோர் முன்னிலையில் இந்த வழக்கு நேற்று முன்தினம் விசாரணைக்கு எடுத்துக் கொள்ளப்பட்ட போதே இந்த வழக்கினை சமரசமாகத் தீர்த்துக்கொள்வதற்கு ஊவா மாகாண கல்வித் திணைக்களம் இணக்கம் தெரிவித்தது.
இதனையடுத்து இரு தரப்பினரும் வழக்கினை சமரசமாக தீர்த்துக் கொள்வதற்கு சம்மதித்தனர்.
இதற்கமைய மீண்டும் பிபிலை வலய கல்விப் பணிப்பாளராக சரீனா பேகம் நியமிக்கப்படவுள்ளதுடன் இலங்கையின் முதலாவது முஸ்லிம் பெண் வலயக் கல்விப் பணிப்பாளர் என்ற பெருமையையும் இவர் பெற்றுக் கொள்வார் என்பது குறிப்பிடத்தக்கது.
இவ் வழக்கில் சரீனா பேகம் சார்பில் ஆர்.ஆர்.டி. நிறுவன சிரேஷ் உறுப்பினர் சட்டத்தரணி ருஷ்தி ஹபீப் ஆஜராகியிருந்தார். இந்த வழக்கில் தமக்குக் கிடைத்த வெற்றியானது இலங்கை முஸ்லிம்கள் சகலருக்கும் படிப்பினைக்குரியது எனவும் முஸ்லிம்கள் தமது உரிமைகளை சட்டத்தின் மூலமாக உறுதிப்படுத்திக் கொள்வதற்கு இந்த சம்பவம் நல்லதோர் எடுத்துக்காட்டு எனவும் சட்டத்தரணி ருஷ்தி ஹபீப் மேலும் குறிப்பிட்டார்.
