vanni 
மன்னார் மாவட்டத்தில் நேற்றையதினம் மேலும் 3 கோவிட் மரணங்கள் பதிவாகியுள்ள நிலையில் மாவட்டத்தில் உள்ள மக்கள் சுகாதார நடைமுறைகளை உரிய முறையில் பின்பற்றி தேவையற்ற நடமாட்டத்தைக் கட்டுப்படுத்தி தங்களையும், தங்கள் குடும்பங்களையும் தொற்றிலிருந்து பாதுகாத்துக் கொள்ள வேண்டும் என மன்னார் மாவட்ட தொற்று நோய் விஞ்ஞான பிரிவிற்கான வைத்திய அதிகாரி வைத்தியர் கே.சுதாகர் தெரிவித்துள்ளார்.
மன்னார் மாவட்ட பிராந்திய சுகாதார சேவைகள் பணிமனையில் இன்று சனிக்கிழமை காலை இடம்பெற்ற ஊடக சந்திப்பின் போதே அவர் தெரிவித்துள்ளார்.
அவர் மேலும் தெரிவிக்கையில்,
மன்னார் மாவட்டத்தில் இவ் ஆண்டு 1560 பேர் கோவிட் தொற்றாளர்களாக அடையாளம் காணப்பட்டுள்ளனர். இந்த மாதம் 536 தொற்றாளர்களும் அடையாளம் காணப்பட்டுள்ளனர்.
மேலும் நேற்றையதினம் மேலும் புதிதாக 21 கோவிட் தொற்றாளர்கள் அடையாளம் காணப்பட்டுள்ளனர்.
நேற்றையதினம் மன்னார் மாவட்ட பொது வைத்தியசாலையில் மேலும் மூன்று கோவிட் மரணங்கள் இடம்பெற்றுள்ளன.
மன்னாரைச் சேர்ந்த ஆண் ஒருவரும், பெண் ஒருவரும் உயிரிழந்துள்ளதுடன், வவுனியாவைச் சேர்ந்த பெண் ஒருவர் மன்னார் மாவட்ட பொது வைத்தியசாலையில் சிகிச்சை பெற்று வந்த நிலையில் உயிரிழந்துள்ளார்.
கடந்த வியாழக்கிழமை 2 மரணம் பதிவாகியுள்ளதோடு, நேற்றைய தினம் 3 கோவிட் மரணம் மன்னார் மாவட்டத்தில் நிகழ்ந்துள்ளது. இதுவரை மன்னார் மாவட்டத்தில் 18 கோவிட் மரணம் சம்பவித்துள்ளது.
எனவே மாவட்டத்தில் கோவிட் மரண சம்பவம் அதிகரித்துச் செல்வதால் மக்கள் பொறுப்புடன் நடந்து கொள்ள வேண்டும்.
மன்னார் மாவட்டத்தில் தற்போது வரை 61000 பேர் வரை முதலாவது தடுப்பூசியையும், 52000 பேர் இரண்டு தடுப்பூசிகளையும் பெற்றுள்ளனர்.
மேலும் கடந்த ஒரு வாரமாக 60 வயதிற்கு மேற்பட்டவர்களுக்கு வீடுகளுக்குச் சென்று சுகாதார குழுவினர் தடுப்பூசியை வழங்கி வருகின்றனர்.
தேவையின்றி வீடுகளை விட்டு வெளியில் செல்வதைத் தவிர்த்துக் கொள்ளுமாறு கேட்டுக்கொள்ளப் படுவதோடு, தேவையின்றி நடமாடுபவர்களுக்கு அன்டிஜன் மற்றும் பி.சி.ஆர்.பரிசோதனைகள் திடீரென மேற்கொள்ள நடவடிக்கை மேற்கொள்ளப்பட்டுள்ளது என தெரிவித்துள்ளார்.