மூதூர் பொலிஸ் பிரிவுக்குட்பட்ட தோப்பூர் ஆஸாத் நகர் மீரா தைக்காப் பள்ளிவாசலினுள் வைத்து நபர் ஒருவர் வெட்டிக் கொலை செய்யப்பட்ட சம்பவம் ஒன்று இடம்பெற்றது.
இச் சம்பவத்தில் பலியான நபர் அச் சமயம் நோன்பு நோற்றிருந்தார் என்றும் பள்ளிவாசலில் சுபஹ் தொழுகையை நிறைவேற்றி விட்டு மசூராவில் இருந்த போதே இந்தச் சம்பவம் இடம்பெற்றுள்ளதாகவும் தெரிய வருகிறது.
பள்ளிவாசலுக்குள் நுழைந்த மூவர் கொண்ட குழுவினரே இவரை வெட்டிக் கொலை செய்துள்ளதாக முதற் கட்ட விசாரணைகளில் தெரிய வந்துள்ளது.
காலை 6.00 மணியளவில் இடம் பெற்றுள்ள.இச்சம்பவத்தில் உயிர் இழந்தவர் கே.எம்.நாஸ்கீன் (வயது 39) என இனங்காணப்பட்டுள்ளார்.
இச் சம்பவத்தில் உயிர் இழந்த நபர் அவரது மைத்துனரை கட்டுத் துவக்கினால் சுட்டு கொலை செய்த குற்றச்சாட்டின் பேரில் மூதூர் பொலிஸாரினால் சந்தேகத்தின் பேரில் கைது செய்யப்பட்டு மூன்று மாதத்திற்கு முன்னர் பிணையில் விடுதலை செய்யப்பட்டவர் எனத் தெரிய வருகிறது.
இதன் பின்னணியிலேயே இக் கொலைச் சம்பவமும் இடம் பெற்றிருக்கலாம் எனச் சந்தேகிக்கப்படுகிறது.
இச் சம்பவத்தில் உயிரிழந்தவரின் மைத்துனர் உட்பட மூன்று நபர்களை மூதூர் பொலிஸார் சந்தேகத்தின் பேரில் கைது செய்து விசாரணைகளை முன்னெடுத்து வருகின்றமை குறிப்பிடத்தக்கது.
