A B 
பேலியகொடை மெனிங் சந்தையில் விற்பனை நிலையங்கள் வழங்குவதில் எவ்வித முறைகேடும் நடைபெறவில்லை என நகர அபிவிருத்தி அதிகார சபை தெரிவித்துள்ளது.
நகர அபிவிருத்தி அதிகார சபையின் பிரதிப் பணிப்பாளர் நாயகம் (சொத்து மற்றும் காணி அபிவிருத்தி) ஈ.ஏ.சி. பிரியசாந்த கடைகளை வழங்குவதில் முறைகேடு நடந்துள்ளதாக யாராவது உணர்ந்தால் மேன்முறையீடு செய்ய முடியும் என்று தெரிவித்தார். அதுபற்றி பரிசீலிக்க தனது அதிகார சபை தயாராக இருப்பதாக அவர் குறிப்பிட்டுள்ளார்.
பேலியகொடை மெனிங் சந்தையின் செயற்பாடுகளை வழமை போன்று முன்னெடுப்பதற்கு இதுவரை ஏற்பாடுகள் செய்யப்பட்டுள்ளதாக பிரியஷாந்த மேலும் தெரிவிக்கின்றார்.
நகர அபிவிருத்தி அதிகாரசபையில் இன்று (26) இடம்பெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கும் போதே அவர் மேற்கண்டவாறு தெரிவித்தார்.
அங்கு அவர் மேலும் தெரிவிக்கையில்,
“மெனிங் சந்தை திட்டம் 2020 டிசம்பரில் கொழும்பு பகுதியில் இருந்து பேலியகொடைக்கு மாற்றப்பட்டது. இந்தச் சந்தை கொழும்பில் இருந்த போது, நகர அபிவிருத்தி அதிகார சபையினால் உருவாக்கப்பட்ட நகர அபிவிருத்தித் திட்டத்தின் படி சகல போக்குவரத்து மற்றும் போக்குவரத்து வசதிகளையும் கணக்கில் கொண்டு மேற்கொள்ளப்பட்டது.
அதற்கு முன் கொழும்பு மெனிங் மார்க்கெட்டில் எத்தனை கடைகள் உள்ளன என்று கணக்கெடுப்பு செய்தோம். அங்கு 1259 பேர் வியாபாரம் செய்து வருவது தெரிய வந்தது.
இதில் 666 பேர் மொத்த வியாபாரம் செய்திருந்தனர். மற்றவர்கள் சில்லறை வியாபாரம் செய்து வந்தனர்.
இந்த சந்தை பேலியகொடைக்கு மாற்றப்பட்ட போது 1288 கடைகள் வர்த்தகர்களுக்கு வர்த்தகத்திற்காக வழங்கப்பட்டது. அந்த மக்கள் அனைவரும் கொழும்பு மெனிங் சந்தையில் வியாபாரம் செய்தவர்கள்.
கொழும்பில் இருந்த போது 5 ஏக்கர் சந்தை இருந்தது. பேலியகொடைக்கு கொண்டு வந்த போது 13 ஏக்கர் பெரியதாக மாறியது. எனவே, 1259 இற்கும் மேற்பட்ட வர்த்தகர்களுக்கு தொழில் செய்ய வசதி செய்து கொடுத்தோம்.
இங்கு சுமார் 315 கடைகள் எஞ்சியுள்ளன. இந்தக் கடைகளை கையகப்படுத்த பல்வேறு சங்கங்களில் இருந்து கோரிக்கைகள் வந்தன. அதன்படி, இதற்காக ஒரு குழுவை நியமித்தோம்.
எமது அமைச்சு மற்றும் நகர அபிவிருத்தி அதிகார சபையின் அதிகாரிகள் அடங்கிய அந்தக் குழுவின் ஊடாகவே யாருக்கு இவ்விற்பனை நிலையங்களை வழங்குவது என்பது தீர்மானிக்கப்பட்டது.
நாங்கள் டெண்டர் நடைமுறைக்கு செல்லவில்லை. அப்படி செய்திருந்தால் இந்த கடைகளில் வியாபாரம் செய்பவர்களை விட மற்றவர்களுக்கு அதிக வாய்ப்புகள் கிடைத்திருக்கும்.
அதன்படி குழு அறிக்கை எங்களுக்கு கிடைத்தது. இந்தக் கடைகள் குறித்து குழுவிடம் விசாரித்து, கடைகளுக்கான தேர்வு நடத்தப்பட்டது. தற்போது, கடை ஒதுக்கீடு செய்யப்படுகிறது,” என்றும் கூறினார்.
அப்போது ஊடகவியலாளர்கள் கேட்ட கேள்விகளும் அதற்கு அளிக்கப்பட்ட பதில்களும் வருமாறு,
- இன்று போராட்டம் நடத்தி இவர்கள் என்ன கோரிக்கை வைக்கிறார்கள்?
அரசாங்கம் என்ற வகையில் மக்களுக்கு நியாயமான விலையில் மரக்கறிகளை வழங்குவதே எமது நோக்கமாகும். நாட்டின் ஏனைய பகுதிகளான நுவரெலியா, பண்டாரவளை மற்றும் தம்புள்ளை ஆகிய பிரதேசங்களில் உள்ள வர்த்தக சங்கங்கள் இங்கு வியாபாரம் செய்வதற்கு இங்கு மாற்றியமைக்கப்பட்டுள்ளன.
வர்த்தக சங்கங்களுக்கு விற்பனை நிலையங்களை கொடுத்ததற்காக, வெளியாட்களுக்கு கொடுத்ததாக இவர்கள் குற்றம் சாட்டுகின்றனர். வெளிமாகாணங்களில் அதிகளவு காய்கறிகள் விளைவிக்கப்படுகின்றன. இவர்களிடம் இருந்து காய்கறிகள் கிடைத்தால் குறைந்த விலையில் மக்களுக்கு வழங்க முடியும்.
- பழைய ஒப்பந்தங்களை மீறி புதியவர்களுக்கு கடைகளை வழங்குவதாக குற்றம் சாட்டுகின்றனர். அரசியல்வாதிகள், நண்பர்கள், ராணுவ தளபதிகளின் மகன்களுக்கு வழங்கப்பட்டதாக கூறப்படுகிறது. அதற்கு என்ன பதில்?
யாருக்கு கடைகளை வழங்குவது என்பதை முடிவு செய்வது நியமிக்கப்பட்ட குழு தான். அந்த குழு ஒரு சுயேச்சையான குழு. கொழும்பு மெனிங் சந்தை வர்த்தகர்களுக்கு அதிக வாய்ப்பை வழங்கினோம்.
அதுமட்டுமல்லாமல், முன்பு சொன்ன வர்த்தக சங்கத்தினருக்கும் வழங்க ஏற்பாடு செய்தோம். குழுவின் முடிவின் படி அனைத்து கடைகளும் வழங்கப்பட்டுள்ளன. பேலியகொடையில் உள்ள வர்த்தகர்களுக்கு ஓரளவு நியாயம் வழங்க வேண்டும். இந்தக் கடைகளை வழங்குவதன் மூலம் யாருக்கும் அநீதி இழைக்கப்படவில்லை. நாங்கள் எந்த கடிதத்தையும் மீறி கடைகளைக் கொடுக்கவில்லை.
- ஆனால் இந்தக் கடைகள் வெளியாட்களுக்குக் கொடுக்கப்பட்டவை என்று இவர்கள் சொல்லிக்கொண்டே இருக்கிறார்கள், இது உண்மையா இல்லையா?
இந்தக் கடைகளை மட்டும் சும்மா மூட முடியாது. இதை விரைவில் திறக்க வேண்டும். அதன்படி 5 பேர் கொண்ட குழு நியமிக்கப்பட்டு அடுத்தகட்ட பணிகள் மேற்கொள்ளப்பட்டன. இது மிகவும் வெளிப்படைத்தன்மையுடன் செய்யப்பட்டது. குழு முடிவு செய்யும் பட்சத்தில் தான் நாங்கள் கடைகளைக் கொடுத்தோம்.
இங்கு வேறு நபர்கள் வியாபாரம் செய்ய வரும்போது, தங்களின் இலாபம் குறையும் என, மெனிங் வர்த்தக சங்கம் அஞ்சுகிறது. சந்தையில் போட்டி அதிகமாக இருப்பதால், நுகர்வோர் காய்கறிகளை மலிவாக வாங்க முடியும். இந்தக் கடைகளை வழங்குவதில் யாருக்கேனும் அநீதி இழைக்கப்பட்டிருந்தால், அவர்கள் மேல்முறையீடு செய்யலாம்.
அந்த முறையீடுகளை கருத்தில் கொண்டு அவர்களுக்கு நியாயம் வழங்கவும், கடைகளை வழங்கவும் தயாராக உள்ளோம். கடைகளை கொடுத்தவர்களில் இராணுவத் தலைவர்களின் மகன்களும் இருக்கிறார்களா? யார் இருக்கிறார்கள் என்று என்னால் சரியாகச் சொல்ல முடியாது. குழுவின் முடிவின்படி அந்த கடைகளை கொடுத்துள்ளோம்.
- இங்கு எத்தனை வெற்றுக் கடைகள் உள்ளன?
315 கடைகள் காலியாக உள்ளன.
- நீங்கள் இன்னும் கடைகளுக்கு தேர்வு செய்கிறீர்களா?
இல்லை, தேர்வுகள் செய்யப்பட்டுள்ளன. ஆனால் சில வாய்ப்புகள் உள்ளன. யாருக்காவது அநீதி இழைக்கப்பட்டிருந்தால் அவர்களுக்கு நீதி வழங்குவோம்.
- எத்தனை கடைகளை கொடுக்க தயாராக உள்ளீர்கள்?
முதற்கட்டமாக 185 கடைகளை வழங்குவோம் என்றார்.