வட மாகாணத்தில் உள்ள அனைத்து பிராந்திய வைத்தியசாலைகளையும் விசேட ஐந்தாண்டு திட்டத்தின் கீழ் அபிவிருத்தி செய்ய நடவடிக்கை எடுக்கப்பட்டுள்ளது.
வட மாகாணத்தில் கிளிநொச்சி, முல்லைத்தீவு, யாழ்ப்பாணம், மன்னார் மற்றும் வவுனியா மாவட்டங்களில் உள்ள அனைத்து பிராந்திய வைத்தியசாலைகளும் வட மாகாண சபையின் ஆதரவுடன் ஐந்தாண்டு மேம்பாட்டுத் திட்டத்தின் கீழ் அபிவிருத்தி செய்யப்பட்டு வருவதாகவும், மாகாணத்தில் வாழும் கிராமப்புற மக்களுக்கு சிறந்த மற்றும் வினைத்திறனான சுகாதார சேவைகளை வழங்க தேவையான நடவடிக்கைகள் எடுக்கப்பட்டு வருவதாகவும் சுகாதார மற்றும் வெகுஜன ஊடக அமைச்சர் டாக்டர் நளிந்த ஜயதிஸ்ஸ தெரிவித்தார்.
வட மாகாணத்தின் மன்னார் மாவட்டத்தில் உள்ள பல வைத்தியசாலைகளுக்கு அண்மையில் விசேட ஆய்வு விஜயம் மேற்கொண்டபோது அமைச்சர் இந்தக் கருத்தை வெளியிட்டார்.
மன்னார் மாவட்டத்தில் உள்ள முருங்கன், அடம்பன், வாங்கலை, நானாதன், சிலாவத்துறை ஆகிய பிராந்திய வைத்தியசாலைகளுக்கு சுகாதார மற்றும் வெகுஜன ஊடக அமைச்சர் வைத்தியர் நலிந்த ஜயதிஸ்ஸ அவர்கள் விஐயம் மேற்கொண்டார்.
ஒவ்வொரு பிராந்திய வைத்தியசாலைகளிலும் பணிபுரியும் ஊழியர்கள் தற்போதைய பிரச்சினைகள் குறித்த கருத்துக்களை முன்வைக்க ஒரு வாய்ப்பை வழங்கவும் அமைச்சர் நடவடிக்கை எடுத்தார்.
அதே சமயம் அந்த வைத்தியசாலைகளில் உள்ள பௌதீக மற்றும் மனித வளப் பற்றாக்குறைகள் குறித்து அமைச்சரிடம் தெரிவிக்க சுகாதார ஊழியர்கள் நடவடிக்கை எடுத்தனர், மேலும் உடனடி தீர்வுகளை வழங்குவதற்காக சம்பந்தப்பட்ட அதிகாரிகளுடன் அமைச்சர் நீண்ட ஆலோசனை நடத்தினார், மேலும் குறுகிய, நடுத்தர மற்றும் நீண்ட கால தீர்வுகளை வழங்க நடவடிக்கை எடுத்தார்.
இந்தப் பகுதிகளில் தற்போது தொற்று மற்றும் தொற்று அல்லாத நோய்கள் இரண்டிலும் ஒரு குறிப்பிட்ட அதிகரிப்பு இருப்பது இங்கு தெரியவந்தது. இதில் சிறப்பு கவனம் செலுத்திய அமைச்சர், பொதுமக்களுக்கு சுகாதார கல்வி திட்டங்களை முறையாக செயல்படுத்தவும், நச்சுத்தன்மையற்ற சத்தான உணவுக்கு பொதுமக்களைப் பழக்கப்படுத்தவும், முறையான சிகிச்சை முறைகளை செயல்படுத்தவும், அது தொடர்பான திட்டங்களை இன்னும் தீவிரமாக செயல்படுத்தவும், தாய்மார்கள், இளம் குழந்தைகள் மற்றும் பள்ளி குழந்தைகளை இலக்காகக் கொண்டு விசேட ஊட்டச்சத்து திட்டங்களை ஒழுங்கமைத்து செயல்படுத்தவும், ஊட்டச்சத்து தொடர்பான விழிப்புணர்வு திட்டங்களை ஏற்பாடு செய்யவும் சம்பந்தப்பட்ட சுகாதார அதிகாரிகளுக்கு நடவடிக்கை எடுக்குமாறு அறிவுறுத்தினார்.
வட மாகாணத்தில் உள்ள வைத்தியசாலைகளில் மருந்துகள் தீர்ந்து போகாமல் இருப்பதை உறுதி செய்வதற்கு வட மாகாணத்தில் உள்ள முறையான வழிமுறை குறித்து கேட்டறிந்த அமைச்சர், வைத்தியசாலைக்கு வரும் நோயாளிகளுக்கு தேவையான அனைத்து சிகிச்சை மற்றும் பராமரிப்பு சேவைகளையும் வழங்கி அவர்கள் ஆரோக்கியமாக இருப்பதை உறுதி செய்வது சுகாதாரத் துறையில் பணிபுரியும் அனைவரின் பொறுப்பாகும் என்றும் சுட்டிக்காட்டினார்.
மேலும், வைத்தியசாலை மாகாண சபையால் கட்டுப்படுத்தப்படுகிறதா அல்லது மத்திய அரசால் கட்டுப்படுத்தப்படுகிறதா என்பது முக்கியமல்ல என்றும், இந்த நாட்டின் ஒட்டுமொத்த மக்களின் ஆரோக்கியத்திற்கான பொறுப்பு சுகாதார அமைச்சரான தன்னிடமே உள்ளது என்றும், இதற்காக அரசாங்கம் ஆண்டுதோறும் பெரும் தொகையைச் செலவிடுவதாகவும், இந்த நாட்டில் இலவச சுகாதார சேவை உலகின் வளர்ந்த நாடுகளுடன் ஒப்பிடத்தக்க அளவில் இருப்பதாகவும் அமைச்சர் மேலும் தெரிவித்தார்.
வட மாகாணத்தில் ஒரு போதனா வைத்தியசாலை, நான்கு மாவட்ட பொது வைத்தியசாலைகள், பத்து அடிப்படை வைத்தியசாலைகள், ஐம்பத்தைந்து மாவட்ட வைத்தியசாலைகள, நாற்பத்தெட்டு பிராந்திய வைத்தியசாலைகள் மற்றும் முப்பத்து மூன்று சுகாதார வைத்திய அதிகாரி அலுவலகங்கள் நிறுவப்பட்டுள்ளன, மேலும் இந்த சுகாதார நிறுவனங்கள் மாகாணத்தில் வாழும் கிட்டத்தட்ட ஒரு மில்லியன் மக்களுக்கு சுகாதார மற்றும் சிகிச்சை சேவைகளை வழங்குகின்றன.
வவுனியா மாவட்ட பாராளுமன்ற உறுப்பினர் எம். ஜெகதீஸ்வரன், வடக்கு மாகாண சுகாதார சேவைகள் பணிப்பாளர் டாக்டர் சமன் பத்திரண, மன்னார் மாவட்ட சுகாதார சேவைகள் பணிப்பாளர் டாக்டர் தர்மராஜன் வினோதன், தலைமை மருத்துவ அதிகாரிகள், பொறுப்பான மருத்துவ அதிகாரிகள், நிபுணர்கள், மருத்துவர்கள், செவிலியர்கள் மற்றும் சுகாதாரத் துறையில் உள்ள அனைத்து தொழில்களையும் பிரதிநிதித்துவப்படுத்தும் ஊழியர்கள் மற்றும் வைத்தியசாலை பிரதிநிதிகள் உள்ளிட்டோர் கலந்து கொண்டனர்.
