உள்ளூராட்சி சபைத் தேர்தல்கள் தொடர்பில் அரசியல் கட்சிகளின் செயலாளர்களுக்கும் தேர்தல் ஆணைக்குழுவின் தலைவர் மஹிந்த தேசப்பிரியவிற்கும் இடையிலான கலந்துரையாடல் ஒன்று இடம்பெறவுள்ளது.
இந்தக் கலந்துரையாடல் எதிர்வரும் 29ஆம் திகதி இடம்பெறவுள்ளதாக தெரிவிக்கப்பட்டுள்ளது.
விகிதாசார முறையிலா அல்லது தொகுதி வாரியான முறையிலா உள்ளூராட்சி சபைத் தேர்தல்களை நடத்துவது குறித்து ஆளும் எதிர்க்கட்சியினரிடையே கருத்து மோதல்கள் இடம்பெற்று வருகின்றன.
தொகுதி வாரியிலான புதிய தேர்தல் முறைமையானது தமக்கு பாதகமாக அமையும் என சிறு அரசியல் கட்சிகள் தெரிவித்து வருகின்றன.
எனினும், சிறு கட்சிகளுக்கு பாதிப்பு ஏற்படாத வகையில், புதிய தேர்தல் முறைமையில் திருத்தங்கள் செய்யப்படும் என அரசாங்கம் வாக்குறுதியளித்துள்ளது.
எனினும், உள்ளூராட்சி சபைத் தேர்தல்களை நடத்துவது குறித்து, ஆளும் தரப்பினரிடையே இன்னும் இணக்கப்பாடு எட்டப்படவில்லை.
எல்லை நிர்ணய அறிக்கையில் திருத்தங்கள் மேற்கொள்ளப்பட உள்ளதாக உள்ளூராட்சி மற்றும் மாகாண சபைகள் அமைச்சு குறிப்பிட்டுள்ளது.
இந்த திருத்தங்கள் அமைச்சரவைக்கு அறிவிக்கப்படவுள்ளதாகவும் அந்த அமைச்சு தெரிவித்துள்ளது.
இவ்வாறான நிலையில், அரசயில் கட்சிகளின் செயலாளர்களை சந்தித்து தேர்தல் ஆணைக்குழுத் தலைவர் கலந்துரையாடலொன்றை நடத்த உள்ளதாக தெரிவிக்கப்பட்டுள்ளது.
