vanni 
ஹஜ் யாத்திரையின் ஊடாக உலகெங்கிலும் உள்ள இஸ்லாமியர்கள் ஒரே நோக்கத்திற்காக ஒரே இடத்தில் ஒன்று சேர்ந்து மானிட ஐக்கியத்தையும் சமூக நல்லிணக்கத்தின் மேன்மையையும் உலகிற்கு பறைசாற்றுகின்றனர் என்று ஜனாதிபதி மைத்திரிபால சிறிசேன விடுத்துள்ள ஹஜ் பெருநாள் வாழ்த்துச் செய்தியில் தெரிவித்துள்ளார்.
அதில் மேலும் தெரிவித்துள்ளதாவது,
தொன்மைக் காலங்களில் இருந்தே மனிதன் சமய நிகழ்வுகளில் ஒன்று சேர்ந்து ஈடுபடுவதை மனித வரலாறுகள் குறிப்பிடுகின்றன. பல யுகங்கள் கடந்து இன்று கூட தாம் பின்பற்றும் சமயத்துடன் பிணைந்துள்ள மனிதர்கள் தமது சமயத்துடன் தனித்துவமான வணக்க வழபாட்டு முறைகளைப் பாதுகாப்பதற்கு ஒற்றுமையோடு தம்மை அர்ப்பணித்துள்ளனர்.
ஹஜ் யாத்திரையின் ஊடாக உலகெங்கிலும் உள்ள இலட்சக்கணக்கான இஸ்லாமியர்கள் ஒரே நோக்கத்திற்காக ஒரே இடத்தில் ஒன்று சேர்ந்து மானிட ஐக்கியத்தையும் சமூக நல்லிணக்கத்தின் மேன்மையையும் உலகிற்கு பறைசாற்றுகின்றனர்.
இறைவனுக்கும் மனிதனுக்கும் இடையிலான தெய்வீகப் பிணைப்பை சிறப்பாக எடுத்துக்காட்டும் இந்த ஹஜ் வணக்கமானது, மனிதர்களுக்கு இடையிலான அனைத்து வேறுபாடுகளையும் மறந்து உலகின் நாற்திசைகளிலும் இருந்து வருகின்ற அனைத்து மக்களும் ஒரே விதமாக இறைவனை வணங்கும் உயர்ந்த வணக்கமாகும்.
பிரிவினை மட்டுமே கோலோச்சும் இன்றைய உலகில் பரஸ்பர பிணைப்பையும் தலைமைத்துவத்திற்கு கட்டுப்படும் போதனைகளையும் சமூகமயப்படுத்தும் ஹஜ் உலகிற்கு வழங்கும் உன்னத செய்தி சமத்துவத்தின் மூலம் கட்டியெழுப்பப்படும் உயர்ந்த சமூக நீதியாகும்.
புனித மக்கா நகரை மையமாகக் கொண்டு முழு உலகிற்கும் விடுக்கப்படும் மனிதர்களுக்கு இடையிலான சமத்துவம் குறித்த இந்த உன்னத செய்தியை மதித்து ஹஜ் வணக்கத்தில் ஈடுபட்டிருக்கும் யாத்திரிகர்களுக்கும் உலக வாழ் முஸ்லிம் சமூகத்திற்கும் எனது இதயபூர்வமான ஈதுல் அல்ஹா தியாகத் திருநாள் நல்வாழ்த்துக்களை தெரிவித்துக் கொள்கின்றேன்.