அண்மையில் விடுவிக்கப்பட்ட வசாவிளான் மாவட்டபுரம் வீதி புனரமைப்பு பணிகள் ஆரம்பம்.

யாழ் வலிகாமம் வடக்கு பிரதேசத்தில் அண்மையில் விடுவிக்கப்பட்டுள்ள பகுதியில் வசாவிளான் தொடக்கம் மாவட்டபுரம் வரையான ஈழகேசரி பொன்னையா வீதி புனரமைக்கும் பணிகளை குரும்பசிட்டி கிராமத்தில் 07.06.2017 புதன்கிழமை அன்று வடமாகாண மீன்பிடி, போக்குவரத்து, கிராம அபிவிருத்தி, வீதி அபிவிருத்தி, வர்த்தக வாணிபம் மற்றும் மோட்டார் போக்குவரத்து அமைச்சர் பா.டெனிஸ்வரன் அவர்களும் வடமாகாண சபை உறுப்பினர் பா.கஜதீபன் அவர்களும் இணைந்து ஆரம்பித்து வைத்தனர்.

அதன்போது வடமாகாண மீன்பிடி, போக்குவரத்து, கிராம அபிவிருத்தி, வீதி அபிவிருத்தி, வர்த்தக வாணிபம் மற்றும் மோட்டார் போக்குவரத்து அமைச்சின் செயலாளர் எஸ்.சத்தியசீலன், வீதி அபிவிருத்தி திணைக்களத்தின் மாகாண பணிப்பாளர் சிவராஜலிங்கம், பிரதம பொறியியலாளர்களான ஜெகானந்தன், அபிராமி மற்றும் வடமாகாண தனியார் பேருந்து உரிமையாளர்கள் சங்க ஒன்றிய தலைவர் சிவபரன் ஆகியோர் பிரசன்னமாகியிருந்தனர்.

குறித்த வீதியானது வீதி அபிவிருத்தி திணைக்களத்தின் 2017ம் ஆண்டுக்கான மாகாண குறித்தொதுக்கப்பட்ட அபிவிருத்தி நன்கொடையில் இருந்து அமைச்சர் பா.டெனிஸ்வரன் அவர்களினால் முதலமைச்சர் உட்பட எதிர்கட்சி உறுப்பினர்கள் மற்றும் அனைத்து மாகாண சபை உறுப்பினர்களுக்கும் ஒதுக்கப்பட்டுள்ள தலா 5 மில்லியன் ரூபா ஒதுக்கீட்டில் கௌரவ உறுப்பினர் கஜதீபன் அவர்களின் சிபார்சின் பெயரில் அபிவிருத்தி செய்யப்படுகின்றது. குறித்த ஒதுக்கீட்டின் மூலம் 3.2 கிலோமீட்டர் நீளமான வீதியின் 710 மீட்டர் வீதியானது புனரமைக்கப்படவுள்ளமை குறிப்பிடத்தக்கது.

ஆரம்ப நிகழ்வின் பின்னர் அமைச்சர் அவர்கள் அப்பகுதியில் அமைந்துள்ள அருள்மிகு முத்துமாரி அம்பாள் ஆலயத்தில் மத வழிபாடுகளில் ஈடுபட்டதோடு பொதுமக்கள் மற்றும் கிராமமட்ட சங்கங்களை சந்தித்தார், அதன்போது வேலைகள் ஆரம்பித்துள்ள குறித்த வீதியின் முழுவதையும் விரைவாக தமக்கு புனரமைத்து தரவேண்டுமெனவும் இரவு வேளைகளில் பயணம் செய்வது ஆபத்தாக உள்ளதாகவும், வீதி சீரின்மையால் பஸ் போக்குவரத்துக்கள் கூட இடம்பெறுவதில்லை எனவும் மக்கள் கோரிக்கை விடுத்தனர்.

அதன்போது கருத்து தெரிவித்த அமைச்சர், தரைமட்டமாக மக்களிடம் கையளிக்கப்பட்ட குறித்த பகுதியானது குறுகிய காலத்தில் மக்களின் அயராத முயற்ச்சியினால் அபிவிருத்தி அடைந்து வருவதாகவும், அதற்க்கு தன்னாலான அனைத்து உதவிகளையும் வழங்குவதாக உறுதி அளித்ததோடு, அக்கிராமத்தின் வளங்களை பயன்படுத்தி செய்யகூடிய தொழில் வைப்புகள் இருக்குமாயின் தனது கிராம அபிவிருத்தி திணைக்களத்தினூடாக செயற்படுத்தி தருவதாகவும் இதன் மூலம் மக்களின் வாழ்வாதரத்தினை முன்னேற்ற முடியுமெனவும் தெரிவித்தார், மேலும் தற்போது அபிவிருத்தி செய்யப்படும் வீதியின் மீதமுள்ள பகுதியினை கிரவல் இட்டு செப்பனிட்டு பாவனைக்கு உகந்த வீதியாக அமைத்துக்கொடுக்க 1 மில்லியன் ரூபாவினை ஒதுக்குமாறும் வீதி அபிவிருத்தி திணைக்கள பணிப்பாளருக்கு பணிப்புரை வழங்கியதோடு அருள்மிகு முத்துமாரி அம்பாள் ஆலயத்திற்கு தனது 2018 ஆண்டுக்கான பிரமாண அடிப்படையிலான நன்கொடை நிதியிலிருந்து 1 இலட்சம் ரூபாய் ஆலய அபிவிருத்திக்கு வழங்குவதாகவும் உறுதியளித்தார்.